प्रशस्त मात्रामा ननिदाउने मानिसले पटक–पटक गरी धेरै खाने भएकाले तिनीहरुको शारीरिक वजन बढ्ने गरेको अमेरिकाको युनिभर्सिटी अफ कोलराडो बोल्डरले गरेको एक अध्ययनले पत्ता लगाएको छ । राति ५ घण्टा मात्र सुत्नेहरुले अत्यधिक खाना खान थालेमा एक सातामा तिनीहरुको वजन झन्डै २ पाउन्डले बढ्ने अनुसन्धानकर्ताको भनाइ छ । बारम्बारको अपुग निद्राका कारण ऊर्जा सन्तुलनमा नराम्रो असर पर्छ । लामो समयसम्म ननिदाई बस्न धेरै ऊर्जा चाहिने र त्यस्तो अवस्थामा ग्रहण गरिने थप क्यालोरी पूर्णरुपमा खर्च नगरिँदा शरीरको वजन बढ्ने उक्त अध्ययनले देखाएको छ । तर निद्रा अपुगको स्थितिमा पनि कार्बोहाइड्रेट र चिल्लोयुक्त खाद्यपदार्थ कम मात्रामा खाएको खण्डमा भने केही हदसम्म वजन नियन्त्रित हुने गर्छ ।