नेपाल विद्युत् प्राधिकरणले अर्को वर्षदेखि लोडसेडिङ १२ घन्टाबाट नबढ्ने जनाएको छ।
लोडसेडिङ न्यूनीकरण गर्न आवश्यक सबै संयन्त्र परिचालन भइरहेको जनाउँदै प्राधिकरणले यो घोषणा गरेको हो। कार्यकारी निर्देशक अर्जुनकुमार कार्कीले यो वर्ष हिउँदमा पनि १२ घन्टाभन्दा बढी लोडसेडिङ नहुने दाबी गरे।
 उनका अनुसार हालसम्म कुलेखानी जलाशयको पानी १५३० मिटर नै छ। ‘३९ मेगावाटको दुहबीको मल्टिफ्युल र साढे १४ मेगावाटको डिजेल प्लान्ट सञ्चालन तयारीमा छन्। हालसम्म भारतबाट १ सय ९० मेगावाट विद्युत् आयात भएको छ ।
कटैया–कुशाह १३२ केभी प्रसारण लाइनको भारततर्फ फेर्नुपर्ने ३ किलोमिटर कन्डक्टर फेर्न सकिए ६० मेगावाटसम्म आयात गर्न सकिने उनले बताए। उक्त प्रसारण लाइनका लागि भारतले बजेट विनियोजन गरी ‘वापकोस’ कम्पनीलाई निर्माण गर्ने जिम्मा दिएको छ।