रौतहट— परालको माँचसँगै जलाएर एक युवतीको हत्या गरिएको छ। कर्कच कर्मैया-३ का जयकिशोर झाको घर नजिकै अन्दाजी २५ वर्षीय युवतीलाई अज्ञात समुहले परालभित्र जलाएर हत्या गरेको प्रहरीले जनाएको छ।
घटना स्थल पुगेका इलाका प्रहरी कार्यालय कटहरियाका प्रहरी नायव निरीक्षक प्रहलाद केशरीका अनुसार परालको माँचमा अज्ञात समुहले आगो लगाएर हत्या गरेको हुन सक्ने बताए। 'माँचको खरानीमा महिलाको दुईवटा खुटा फेला परेका छन्', उनले नागरिकन्युजसँग भने- 'घुँडामुनिको भाग हेर्दा र नङ्गपालिस लाएको भेटिएकाले महिलालाई जलाएर मारेको हुनसक्छ।'