संविधानसभाको दोस्रो निर्वाचनको अन्तिम परिणाममा मधेसी पार्टीहरूले नराम्रो हार बेहोरे पनि समानुपातिकतर्फ उनीहरूले अघिल्लो चुनावमा पाएकै मत कायमै छ ।
पहिलो संविधानसभामा ४ वटा मात्र मधेसी पार्टीहरू थिए । यी चार पार्टी (मधेसी जनअधिकार फोरम–नेपाल, तराई मधेस लोकतान्त्रिक पार्टी, सद्भावना पार्टी र नेपाल सद्भावना पार्टी–आनन्दीदेवी) ले जम्मा खसेको मतको ११–

५५ प्रतिशत मतका आधारमा समानुपातिक तर्फ उनीहरूले ४० सिट पाएका थिए ।
यसपालीको संविधानसभामा मधेसी दलहरूको संख्या बढेको छ । समानुपातिक तर्फ १० वटा मधेसी पार्टीहले संविधानसभामा सिट सुरक्षित गरेका छन् । यी दस पार्टीको समानुपातिक तर्फको सिट संख्या यसपाली पनि ४० नै छ ,यी दस पार्टीले यसपाली समानुपातिक तर्फ १० लाख ९० हजार ६ सय ९५ मत ल्याए । यो समानुपातिकतर्फ सदर मतको ११–५२ प्रतिशत हो ।
गत संविधान सभामा प्रत्यक्षतर्फ ४३ सिट जितेका मधेसी पार्टीहरूले यसपाली १२ सिटमा खुम्चिएका छन् । त्यसमाथि पनि मधेसी पार्टीका थुप्रै ठूला नेताहरूले नै चुनाव हारेका छन् । समानुपातिकतर्फको मत कायम रहदाँ पनि प्रत्यक्षतर्फ मधेसी पार्टीका उम्मेदवारले हार्नुका पछाडि धेरै कारण हुनसक्छन् ।
नेताहरू आफ्नै स्वार्थमा डुबेको, भ्रष्ट भएको र मधेस र मतदातालाई भुलेको प्रशस्तै गुनासा उनीहरूले गरेका थिए । मतदाताको असन्तुष्टीनै प्रत्यक्षतर्फ मधेसी नेताहरूले हार्नुको प्रमुख कारण हुनसक्छ ।
पार्टी विभाजनले एकातर्फ मतदातमा नकारात्मक धारणा बनायो भने अर्कोतर्फ मधेसी उम्मेदवारहरू बीच नै मत विभाजन गरिदियो ।
समानुपातिकतर्फ मधेसी पार्टीहरूको मत कायम रहनुमा मधेस मुद्दाका अलावा जातीयताको ‘फ्याक्टर’ भने यसपाली महत्वपूर्ण देखिएको छ ।
समानुपातिक तर्फ यसपाली मत भने गच्छदारले नेतृत्व गरेको मधेसी जनअधिकार फोरम–लोकतान्त्रिकले अन्य मधेसी पार्टीको भन्दा धेरै पायो । फोरम लोकतान्त्रिकले २ लाख ७४ हजार ९ सय ८७ मत ल्याउदा उपेन्द्र यादवको फोरम नेपालले २ लाख १४ हजार ९ सय १९ मत मात्र ल्यायो ।
लगभग ७ प्रतिशत जनसंख्या रहेको थारू समुदायको मत पाएर नै फोरम लोकतान्त्रिक समानुपातिकतर्फ मधेसीमध्ये सबैभन्दा ठूलो पार्टी बन्यो । त्यस्तै लगभग ४ प्रतिशत जनसंख्या रहेको यादवहरूको मत पाएर नै उपेन्द्र यादवले नेतृत्व गरेको फोरम–नेपाल मधेसी पार्टीमध्ये समानुपातिक तर्फ दोस्रो धेरै मत पाउने पार्टी भएको छ ।