फाइल तस्बिर

दोस्रो संविधानसभा चुनावमा हिजो देशभर खसेको मतको गणना बुधावर बिहानबाट शुरु हुने निर्वाचन आयोगले बताएको छ। मतगणना शुरु भएपछि प्रत्येक दुईदेखि तीन घण्टाको अन्तरमा स्थानीय स्तरबाटै र आयोगको वेबसाइटबाट समेत पछिल्लो परिणामहरु सार्वजनिक गर्दै जाने बताइएको छ।अयोधिप्रसाद यादव, आयुक्त, निर्वाचन आयोग विभिन्न मतदान केन्द्रहरुमा धाँधली भएको भन्दै दलहरुले पुन: निर्वाचनको माग राखेको भए पनि जुम्लाको एउटा मतदान केन्द्रमा मात्रै पुन: निर्वाचन हुने आयोगको भनाइ छ।

अन्य ठाउँहरुमा धाँधली भएको हो वा होइन भन्ने कुरा आयोगको संयन्त्रले नै अनुसन्धान गर्ने र त्यसपछि पुन: निर्वाचन गर्नु पर्ने वा नपर्नेबारे निर्णय गर्ने आयोगले बताएको छ।
निर्वाचन आयोगले प्रत्येक दुई तीन घण्टाको फरकमा ताजा मतपरिणामहरु सार्वजनिक गर्दै जाने उल्लेख गरेको छ। निर्वाचन आयुक्त अयोधिप्रसाद यादवले भने, "मंगलवार राति सम्म प्राय: सबै सदरमुकामहरुमा मतपेटिका ल्याइसकिएको छ। बुधवार १० बजेसम्ममा लगभग सबै स्थानमा मतगणना शुरु हुनेछ।"
पहिलो हुनेले जित्ने तर्फको निर्वाचन परिणाम एक हप्ताभित्र र समानुपातिकतर्फको तीन हप्ताभित्र आइसक्ने आयोगले जनाएको छ।