विराटनगर । निर्वाचन बहिष्कारको घोषणा गरेको नेकपा–माओवादीका कार्यकर्ताहरुले बिहीबार मोरङका दुई ठाउँमा निर्वाचन सामग्रीमा आगजनी गरेका छन् । मोरङको पथरी र डाँगीहाटमा माओवादी कार्यकर्ताले सामग्री वितरणका लागि पुगेका निर्वाचन कार्यालयका कर्मचारीबाट खोसेर मतदाता शिक्षा हातेपुस्तिका जलाएका हुन् । डाँगीहाट १ मा करिव ४० जनाको समुहमा आएका माओवादी कार्यकर्ताले हाते पुस्तिका नियन्त्रणमा लिएर पेट्रोल छर्केर आगो लगाएको मोरङ प्रहरीले जनाएको छ ।
त्यस्तै करिव २० जनाको संख्यामा आएका माओवादी कार्यकर्ताहरुले पथरी स्थित मुख्य सडकमा पेट्रोल लगाएर एक बोरा मतदाता शिक्षा हाते पुस्तिका जलाएका छन् । निर्वाचन आयोगले पठाएको हातेपुस्तिका शनिश्चरे गाविसबाट नियन्त्रणमा लिएर मुख्य सडकमा ल्याएर जलाइएको नेकपा–माओवादी मोरङका सचिव लोचन धमलाले बताए । जिल्ला निर्वाचन कार्यालय मोरङका प्रमुख झङ्कनाथ शर्माले निर्वाचन सामग्रीमा आगजनी गरिएको बारेमा थाहा हुन नसकेको बताए ।
मोरङ प्रहरी प्रमुख एसपी विश्वराज पोखरेलले निर्वाचन सामग्री जलाउनेको खोजी भइरहेको बताए ।