काठमाडौं /

राजनीतिक घटनाक्रमले नै नेपालको आर्थिक विकास प्रभावित भएको निश्कर्षसहित अब आर्थिक विकासमा केन्द्रित हुनैपर्ने समय आएको विश्व बैंकको भनाइ छ ।

सरकारले चालु आर्थिक बर्षमा साढें ५ प्रतिशतको आर्थिक बृद्धिको लक्ष्य राखेपनि आर्थिक बृद्धिदर ४ देखि साढें ४ प्रतिशतमा सीमित हुने प्रक्षेपण बैंकले गरेको छ ।

सन् २००९ देखि नेपालको औसत विकास दर ४ प्रतिशतको हाराहारीमा रहँदै आएको छ । अपेक्षित रुपमा सरकारी र निजी क्षेत्रको लगानी बढ्न नसक्दा विकासको गती बढ्न नसकेको जनाइएको छ ।

विश्व बैंकको नेपालका लागि देशीय निर्देशक जोहान्स जटले नेपाल जस्तो विकासोन्मुख राष्ट्रका लागि आर्थिक बृद्धिदर ७ देखि ८ प्रतिशत आवश्यक हुने उल्लेख गरे ।

निर्धारित समयमा सफलतापूर्वक चुनाव सम्पन्न हुनसके लगानीकर्तामा आत्मविश्वास बढ्न जाने र अर्थतन्त्रमा सुधार आउने विश्वास बैंकको छ ।

बैंकका बरिष्ठ अर्थविद् औरेलिन क्रुजले यससम्बन्धी कार्यपत्र प्रस्तुत गरेका थिए ।

मुद्रास्फीति ८ प्रतिशतमा सिमित राख्ने सरकारी लक्ष्य छ । बैंकले यो बर्ष मुद्रास्फीति १० प्रतिशतभन्दा तलसम्म रहने अनुमान गरेको छ ।

विप्रेषणले अर्थतन्त्र धानेको र यसमा सुधार जारी रहने पनि बैंककोे प्रक्षेपण छ । भारतीय मुद्रासँगको स्थीर विनिमय दर नेपालका लागि अहिलेको अवस्थामा फाइदाजनक नै रहेको पनि बैंकले जनाएको छ ।

यसबारे गहिरो अध्ययन र विश्लेषणपछि मात्र कदम चालिनु ठीक हुने पनि बैंकको सुझाव छ ।