धरान–१९ मा गैरकानुनी रुपमा सञ्चालनमा रहेको एक आवाशीय बोर्डिङ स्कुलमा विगत १३ वर्षदेखि बालिकाहरु माथि चरम यौन शोषण हुने गरेका रहस्य सोमबार खुलेका छ ।

इम्यानुएल इङ्लिस बोर्डिङ स्कुलको होस्टेलमा बस्ने ५३ जना मध्ये अधिकांश बालिका  सोही स्कुलका प्रिन्सिपल भारतीय नागरिक कचिङ मारामबाट यौन शोषणमा पर्दैै आएको पाइएको छ । होस्टेलमा ५ वर्ष देखि १८ वर्ष सम्मका बालिकाहरु मारामको संरक्षणमा बस्दै आएका थिए ।

११ वर्षीय एक बालिकाले दिएको जानकारी अनुसार मारामले ती बालिकाहरुको संवेदनशील अंगहरुमा छुने ,आपत्तिजनक क्रियाकलापहरु गर्ने गरेका थिए । सोही होस्टलमा तीन वर्षसम्म बसेकी  एक १७ वर्षीय किशोरीले आफूलाई धेरै पटक प्रिन्सिपलले यौन शोषण गरेको बताएकी छिन् । उनले भनिन् "जहिलै आएर त्यस्तो गथ्र्याे, मलाई मात्र हैन सानो बहिनीहरुलाई पनि त्यस्तै गरिरहन्थ्यो ।"

मारामले बालिकाहरुलाई शारिरीक तथा मानसिक यातना पनि दिने गरेको बालिकाहरु बताउँछन् । सो स्कुलमा असहाय तथा विपन्न आर्थिक स्थिति भएका बालिकाहरु पढ्दै आएका छन् । सोमबार एक बालिकाले सो रहस्य खोले पछि स्थानीय महिला अधिकारकर्मीहरुको पहलमा माराम र उनकी श्रीमती रेडिला मारामलाई इलाका प्रहरी कार्यालय धरानमा बुझाएका छन् ।

वि.सं. २०५७ सालमा जिल्ला शिक्षा कार्यालय सुनसरीबाट कक्षा ५ सम्म स्कुल सञ्चालन अनुमति लिएको तर अहिले गैरकानुनी रुपमा कक्षा–७ सम्म पढाइरहेको समेत रहस्य खुलेको छ । विद्यालय क्रिस्चियन मिसिनरी संस्थाहरुको आर्थिक सहयोगमा विगत १४ वर्षदेखि सञ्चालमा रहेको छ ।