हालै पाकिस्तानमा  सम्पन्न संसदीय निर्वाचनमा  सरिफको दल अग्रस्थानमा देखिएको छ । मत  परिणामले सरिफ तेस्रो पटक प्रधानमन्त्री बन्ने लगभग निश्चित भएको छ ।
सुस्तरी आइरहेको मत गणना परिणामअनुसार  सरिफको पार्टी पाकिस्तान मुस्लिम लिग-नवाज (पीएमएलएन) १ सय १५ स्थानमा अग्रपंक्तिमा रहेको जनाइएको छ । २ सय ७२ सिटका लागि निर्वाचनमा सरिफले उठेका दुवै स्थानबाट जितेका छन् । भारतीय प्रधानमन्त्री मनमोहन सिंहले टि्वटरबाट उनलाई बधाई दिइसकेका छन् । पूर्व क्रिकेट खेलाडी इम्रान खानको पार्टी तेहरिक ए इन्साफ प्रमुख प्रतिपक्ष बन्ने सम्भावना देखिएको छ । सत्तारूढ पाकिस्तान पिपुल्स पार्टी भने केही स्थानमा अगाडि छ । नेता सरिफले सरकार निर्माणका लागि पार्टीभित्र र बाहिर छलफल थालिसकेको बताइएको छ । उनको पार्टीलाई एकलौटी सरकार चलाउन मिल्ने गरी बहुमत भने प्राप्त हुने छैन । उनले प्रमुख प्रतिपक्षी बाहेकका साना दलसँग मिलेर सरकार बनाउने सम्भावना छ । सरिफ सन् १९९० नोभेम्बरदेखि १९९३ जुलाईसम्म र १९९७ फेबु्रअरीदेखि १९९९ सम्म प्रधानमन्त्री बनेका थिए । सन् १९९९ मा तत्कालीन सैनिक शासक परभेज मुसर्रफले उनलाई सैनिक कुबाट हटाएका थिए । कु गरी हटाउने मुसर्रफ भने हाल जेल जीवन बिताइरहेका छन् । यस निर्वाचनबाट पाकिस्तानको ६६ वर्षको इतिहासमा पहिलोपटक प्रजातान्त्रिक तरिकाले निर्वाचित सरकारले आफ्नो पाँच वर्षे कार्यकाल पूरा गरी अर्को प्रजातान्त्रिक तरिकाले निर्वाचत सरकारलाई सत्ता हस्तान्तरण गर्ने अवस्था सिर्जना गरेको छ ।