सरकारी र निजी क्षेत्रका चिकित्सकले पारो (मर्करी) र पारोयुक्त उपकरण प्रयोग नगर्ने भएका छन् । मर्करीको अनियन्त्रित उपयोग रोक्न स्वास्थ्य मन्त्रालयले पहल गरेपछि यसको प्रयोग नहुने भएको हो । सरकारी र निजी क्षेत्रलाई पारोयुक्त उपकरण प्रयोग नगर्न अनुरोध गरिसकेको छ । स्वास्थ्य तथा जनसंख्या मन्त्रालयले मातहतको निकायमा पारोयुक्त उपकरणको खरिद र उपयोग बन्द गर्न निर्देशन दिएको छ । मन्त्रालयले स्वास्थ्य सेवा विभाग, औषधि व्यवस्था विभाग र आयुर्वेद विभागलाई पत्र पठाएर आर्थिक वर्ष ७०/७१ देखि मर्करीयुक्त उपकरणको आयात बन्द गर्न निर्देशन दिएको हो ।

स्वास्थ्य क्षेत्रको थर्ममिटर, रक्तचाप नाप्ने मेसिनलगायत उपकरणमा पारो उपयोग हुन्छ । 'सरकारी निकाय मात्र नभई निजी क्षेत्रलाईसमेत मर्करीयुक्त उपकरण खरिद र उपयोग नगर्न अनुरोध गरिएको छ,' उपसचिव कविराज खनालले भने, 'हामीले सम्बद्घ निकायमा निर्देशन पठाइसकेका छौं ।' विशेषज्ञहरूले सरकारी वा निजी अस्पतालमा पारोलाई उचित प्रबन्धन नगरिने अवस्था औंल्याउँदै यसले वातावरणीयसँगै मानव स्वास्थ्यमा जोखिम थपेको बताउँदै आएका थिए ।