झापामा एक महिनाको अवधिमा चौथौपटक चार स्थानमा बर्डफ्लु फेला परेको छ । पछिललो पटक झापाका मेची नगर, चन्द्रगढी, भद्रपुर र पृथ्वी नगरमा पालिएका स्थानीय जातका कुखुरा, हाँस तथा बोइलरमा एकैसाथ बर्डफ्लु फेला परेको हो ।
जिल्ला पशु सेवा कार्यालय झापाका प्रमुख डाक्टर जगदिश पाण्डेले दिनु भएको जानकारी अनुसार मेची नगर ११ की शोभा कार्की, चन्द्रगढी ४ का धनबहादुर लिम्बु, पृथ्वीनगर ५ का प्रेमबहादुर जोगीका घरमा पालेका स्थानीय जातका कुखुरामा बर्डफ्लु फेला परेको हो भने भद्रपुर ८ का कृष्णप्रसाद सापकोटाले पालेका बोइलर कुखुरामा बर्डफलु पुष्टि भएको हो ।
जिल्ला पशु सेवा कार्यालयको दक्ष पशु चिकित्सक टोलीले आज विहान मेची नगर ८ की शोभा कार्कीका घरमा पालेका ८० वटा स्थानीय जातका कुखुरा र २ वटा हाँस नष्ट गरिएको छ भने भद्रपुर ८ का कृष्ण सापकोटाका घरमा पालिएका बोइलर ३ सय ९३ वटा र २ सय किलो चारो नष्ट गरिएको कार्यालयले जानकारी दिएको छ । अन्य स्थानमा आजै साँझमा नष्ट गर्ने पनि कार्यालयले जनाएको छ ।
वर्डफ्लुका संकट ग्रस्त क्षेत्र घोषणा नगरी झापामा वर्डफ्लु नियन्त्रण हुन नसक्ने विषेशज्ञहरुको भनाई छ । सीमावर्ती क्षेत्रमा अवैध रुपमा भारतीय बजारबाट कुखुरा भित्र्याएर बर्डफलुको आतङ्क मच्चाएको स्थानीयको आरोप छ ।
पंकज शर्मा, झापा, ५ वैशाख

प्रतिक्रिया दिनुहोस् >>