टोल विकास संस्थाहरु निस्क्रिय भएपछि टोलविकास संस्थाहरुको बचतलाई संकलन गरी एकीकृत लगानी गर्ने योजना असफल भएको छ ।

इटहरीका टोलविकास संस्थामा संकलन भएको बचतलाई संकलन गरी समुदायमा लघु वित्त कार्यक्रममा खर्च गर्ने योजनामा टोलविकास लघुवित्त सहकारी संस्थाको स्थापना गरेपनि टोलविकास संस्थाहरु आबद्ध हुन नआएका हुन् ।
एक वर्षअघि स्थापना गरिएको सो सहकारी संस्थामा हालसम्ममा १२ वटा मात्र टोलविकास संस्थाहरु आबद्ध भएर बचत गरिरहेको संस्थाले जानकारी दिएको छ । डेढसय बढी सहकारी संस्थामध्ये एक दर्जन मात्र आबद्ध भएपछि यो सहकारीले लक्ष्य पाउन नसक्ने अवस्था सृजना भएको छ ।
सहकारीमा आबद्ध हुन टोलविकास संस्थाले पाँच हजार रुपैयाको शेयर खरीद गरी मासिक पाँच सय रुपैया जम्मा गर्नुपर्ने प्रावधान राखिएको छ । तर टोलविकास संस्थाहरु नै निस्क्रिय जस्तै बनेपछि अहिले व्यक्तिगत बचत संकलन र परिचालनमै यो संस्था खुम्चिएको छ ।
सहयोगी दातृ निकायको अभावमा इटहरी नगरपालिकाले पछिल्लो समयमा टोल विकास संस्था परिचालनको कार्यक्रम स्थगित गरेको छ । सोही कारण नगरपालिकाले प्रभावकारी समन्वय र परिचालन गर्न नसक्दा एकीकृत बचत संकलन र ऋण परिचालन हुन नसकेको जनाइएको छ ।
सुनसरी, चैत १८

प्रतिक्रिया दिनुहोस् >>